უსახელოური

წითელყურძნიანი ვაზის ჯიში “უსახელოური” (უსახელაური) ლეჩხუმის ღვინოა. უმაღლესი ხარისხის, ბუნებრივად ნახევრადტკბილი ღვინო ცაგერის რაიონის სოფლების – ოყურეშის, ზუბის და ისუნდერის ვენახებიდან დაკრეფილი უსახელოურისგან მიიღება. იგი საინტერესოა განსაკუთრებით მათთვის, ვისაც ნახევრადტკბილი ღვინო მოსწონს. უსახელოური ძალიან მაღალმჟავიანი და მაღალშაქრიანი ყურძენია.

ამ სიმჟავის და შაქრის ერთობა  საოცარი ნაზავია. მას აქვს მუქი ლალისფერი შეფერილობა და საკმაოდ სხეულიანი და ტანინიანია. ძალიან მდიდარია ჯიშური არომატებითა და ველური კენკრის, ალუბლის, ბროწეულისა და იის ტონებით. ახასიათებს ძალზე ხანგრძლივი გემო.

ვენახები ფერდებზეა დაკიდული. სადაც უამრავი მაყვალი, ასკილი და სხვა კენკრა ხარობს. ხეობაში მზე მალე ჩადის, მალე ეფარება რომელიმე მთას, ამიტომ სავენახე ფერდი აუცილებლად სამხრეთს უნდა უყურებდეს, ვაზი რომ მუდმივად მზის გულზე იყოს და სიტკბო შეიძინოს. საღამოს კი სწრაფად ეცემა ტემპერატურა, ღამით სიცივეა, ამ დროს უსახელოური მჟავიანობას აგროვებს. ამიტომაცაა უსახელოური შემართული, თამამი და ამავდროულად, ნაზი და ტკბილი.